News-Details

Chuo Kikuu Mzumbe kimeendelea kuwekeza katika maendeleo ya rasilimali watu kwa kuwajengea wataalamu uwezo na umahiri wa kitaalamu katika Itifaki na Uratibu wa Matukio, kupitia mafunzo ya siku tano yaliyofanyika kuanzia Agosti 31 hadi Septemba 4, 2026, katika Hoteli ya Edema mkoani Morogoro, yakilenga kuimarisha uwezo wa washiriki katika maandalizi, usimamizi na utekelezaji wa matukio kwa ufanisi, weledi na kuzingatia viwango vinavyolinda hadhi na taswira ya taasisi. Akiwezesha mafunzo hayo, Mhadhiri wa Chuo Kikuu Mzumbe ambaye pia ni Msaidizi Mahsusi wa Makamu Mkuu wa Chuo Kikuu Mzumbe, Dkt. Aloyce Gervas, alisisitiza kuwa ubora wa tukio hauishii katika kufanyika kwake, bali unaonekana katika uzoefu ambao mgeni anapata na taswira ambayo taasisi inaacha baada ya tukio. Aidha, Dkt. Gervas alieleza kuwa kila hatua katika tukio rasmi kuanzia maandalizi, mapokezi, mawasiliano, upangaji wa viti hadi namna mgeni anavyopewa huduma ina uwezo wa kuimarisha au kudhoofisha heshima na uaminifu kwa taasisi. Kwa mtazamo huo, washiriki walihimizwa kuichukulia itifaki kama nyenzo ya kimkakati ya kujenga mahusiano, kulinda hadhi ya taasisi na kuongeza ufanisi wa matukio, badala ya kuiona kama utaratibu wa kawaida unaotekelezwa kwa mazoea. Mafunzo hayo pia yamewapa washiriki fursa ya kutafakari upya nafasi yao katika mafanikio ya matukio wanayoyasimamia. Kupitia mijadala na mafunzo ya vitendo, walijifunza kwamba mafanikio ya tukio mara nyingi huamuliwa na maandalizi ya mambo madogo ambayo hayaonekani hadharani, lakini yanapopuuzwa yanaweza kuathiri mtiririko wa tukio, uzoefu wa wageni na hatimaye taswira ya taasisi. Akifunga rasmi mafunzo hayo, Kaimu Mkurugenzi wa Huduma za Jamii Chuo Kikuu Mzumbe, Dkt. Bertha Mwinuka, aliwataka washiriki kuyageuza maarifa waliyoyapata kuwa mabadiliko yanayoonekana katika maeneo yao ya kazi. Dkt. Mwinuka alisisitiza kuwa thamani ya mafunzo haipo katika maarifa yanayobaki darasani wala katika cheti pekee, bali katika mabadiliko ya namna mtu anavyofanya kazi, anavyohudumia watu na anavyotatua changamoto. Aliwahimiza washiriki kutumia ujuzi huo kuongeza ubora wa huduma, kuimarisha nidhamu ya kazi na kuhakikisha kila tukio wanaloliratibu linaakisi viwango vya weledi vinavyotarajiwa na taasisi. Maarifa na ujuzi uliopatikana kupitia mafunzo haya yanatarajiwa kuboresha utendaji, kuongeza ufanisi, kuimarisha mahusiano na wadau na kuinua viwango vya huduma. Kwa Chuo Kikuu Mzumbe, mafunzo haya ni sehemu ya uwekezaji endelevu katika kujenga uwezo wa wataalamu na kuendeleza weledi unaochangia mabadiliko chanya katika taasisi na jamii.